ОХУ-д гоц халдварт "Сибирийн яр” өвчний халдвар тархсанаар 12 настай хүү нас баржээ. Мөн 160 гаруй хүнийг нүүлгэн шилжүүлж, 90 хүнийг эмнэлэгт хэвтүүлсэн байна.

Тус улсын Ямало-Ненецийн автономит мужид цаа бугатай олон айл өрх амьдардаг бөгөөд өвчний халдвар авсан 2300 гаруй цаа буга үхээд байгаа ажээ.

Нянгийн гаралтай, амь насанд хүрэх аюултай энэ өвчин өнгөрсөн 7 дугаар сарын сүүлчээр дэгдсэн. Халдвар авсан есөн хүнээс дөрөв нь хүүхэд байгаа юм.

Цаг агаар хэт халж тус мужийн мөнх цэвдэг хайлснаар энэ халдварт өвчний нянгууд идэвхжсэн байх магадлалтайг албаныхан хэллээ.

Дунджаар ердөө 10-15°C хэм халдаг тус мужид сүүлийн үед температур 38°C хэмээс давж халжээ.

Энэхүү гоц халдварт өвчин 75 жилийн өмнө тархаж байсан юм.