Өнгөрсөн оноос эхлэн орон сууцны зээл болох найман хувийн зээлийг тодорхой шалтгаануудын улмаас түр зогсоох шийдвэрийг гаргасан билээ.

Анх найман хувийн хүүтэй орон сууцны зээлийг барилгын үнэ ханшийг буулгаж, иргэдийг орон сууцжуулах зорилгоор Засгийн газар арилжааэы банкуудаар дамжуулан гаргасан. Гэтэл Монголбанкны мэдээгээр өнгөрсөн зургадугаар сарын байдлаар 8464 иргэний 520.7 тэрбум төгрөгийн зээлийн хүсэлтийг хүлээн авч, 2495 иргэний таван хувийн хүүтэй 118 тэрбум төгрөгийн, 4776 иргэний найман хувийн хүүтэй 321.4 тэрбум төгрөгийн зээлийг тус тус олгохоор шийдвэрлэсэн байна. Гэвч энэ зээл хэрэгжиж эхэлсэн цагаасаа эхлээд л орон сууцны үнийг тогтворжуулах нь бүү хэл улам өсгөсөн. Үүнийг дагаад валютын ханш ч огцом өслөө гэх дүгнэлтийг судлаачид хийгээд байгаа юм.

Орон сууцны найман хувийн зээлд хамрагдахын тулд зээлийн урьдчилгаа 30 хувиа өгөөд 10-20 жилийн хугацаанд зээлд хамрагдах боломжтой байсан юм. Харин зээлдэгчийн орлогын харьцаа өрхийн татварын өмнөх орлогын 45 хувиас хэтрэхгүй байх гэхчилэн олон шалгууртай байсан. Гэтэл банкууд энэ зээлийг олгохгүй болсноо мэдэгдэж зогсоосон. Учир нь мөнгөний эх үүсвэр, санхүүжилт байхгүй гэсэн шалтгаанаар хэзээ үргэлжлэх нь тодорхойгүй хугацаагаар зогссон. Уг нь иргэд өөрийн гэсэн байртай болно гэдэг үл хөдлөх хөрөнгөтэй болж байна гэсэн үг. Урьдчилгаагаа төлөөд байрны захиалга өглөө гэхэд банкнаас найман хувийн зээл гаргаж өгөхгүй болохоор иргэд тэр дундаа залуус өөрийн гэсэн оронтой болох асуудал нь худлаа буюу мөрөөдөл болчихоод байгаа ч энэ зээлийг үргэлжлүүлэн хэрэгжүүлээсэй гэсэн хүлээлт ч бий болсон байгаа нь нууц биш юм.

Тэгвэл өчигдөр Ерөнхий сайд сайхан мэдээ дуулгав. Тэрбээр "Засгийн газар орон сууцны найман хувийн зээлийг үргэлжүүлнэ” гэдгээ мэдэгдсэн юм. Ямартай ч түр зогссон шийдвэр үргэлжлэн хэрэгжиж, борлуулалт үгүй зогссон олон байрууд ашиглалтад орох нь тодорхой болов.

О.Сайхан