Рио 2016 олимпийн наадмын  бөхийн чөлөөт барилдааны 65 кг-д хүч үзсэн манай бөх МУГТ Ганзоригийн Мандахнаран  хүрэл медалийн төлөөх барилдаанд харамсалтайгаар ялагдаж, шагналт тавдугаар байрт орсон билээ. Тодруулбал  барилдааны цаг дуусахаас хэдхэн секундын өмнө 7:6 харьцаатайгаар  ялж явсан Г.Мандахнаран  илт хамгаалсан барилдаан үзүүлснээр цагийн төгсгөлд нэг оноогоор торгуулж, улмаар дүрэм ёсоор сүүлийн авсан оноогоороо Узбекстаны бөх Наврузов  олимпийн наадмын хүрэл медаль хүртсэн билээ.

Улмаар  барилдааны дараа манай дасгалжуулагч нар дэвжээн дээр хувцасаа тайлан, шүүгчдийн шийдвэрийг эрс эсэргүүцсэн ч тусыг эс олсон. Үүний дараа ОУ-ын томоохон хэвлэл мэдээллийн төлөөллүүд, спортын хүрээнийхэн мэдэгдлүүдийг хийж, манай тамирчин, дасгалжуулагчдыг дэмжиж буйгаа илэрхийлж байгаа.

Тэгвэл харамсалтайгаар олимпийн наадмын медалиа өрсөлдөгчдөө алдсан Г.Мандахнаранд  дурсгалын медаль хийж, гардуулах үйл ажиллагааг Монголын чөлөөт бөхийн Мастеруудын холбооноос зохион байгуулах гэж байна. Тэд Г.Мандахнаранд шижир алтаар цутгасан хүрэл медаль бэлэглэх аяныг энэ сарын 28 хүртэл зохион байгуулахаар болжээ. Одоогоор аяны хүрээнд 20 сая төгрөг цугларсан аж.

Харин энэ сарын 29-ны өдөр шижир алтаар цутгасан дурсгалын медалиа Спортын төв ордны өмнө  МУГТ Г.Мандахнаранд гардуулан өгөхөөр төлөвлөжээ.