Азгүйтэж осолдсон жолооч машинаа Журмын хашаанд хийлгэдэг. Журмын хашаанд орсон машин хоногт тодорхой хэмжээний төлбөр төлдөг нь шинжээч ажлаа алгуурлах шалтгаан болдог байж тун магадгүй.

Осолд орж эвдэрсэн машинаа журмын хашаанд хийлгэсэн нэгэн эр ингэж өгүүлсэн юм. "Осолдож хэмхрээд Журмын хашаанд орсон машиныг шинжээчийн дүгнэлтгүйгээр авч болдоггүй юм байна. Энэ ч яах вэ, зүй ёсны хэрэг биз. Харин тэр шинжээчийг нь ирүүлэх гэж бүр ядлаа. Албан өрөөнд нь очих бүрт байхгүй. Утсаар холбогдохоор гадаа ажилтай гээд халгаахгүй. Тэгэс ингэс гэсээр сар гаран болгочихож байгаа юм шүү дээ. Миний бодлоор мань эр журмын хашаанд эвдрэл хэмхрэлтэй машин цугларахыг л хүлээгээд гадуур бусад ажлаа амжуулаад байсан шиг байгаа юм. Тэгж тэгж нэг ирэнгүүтээ машиныг хэдэн талд нь гарч хараад л хэдхэн минутын дотор дүгнэлтээ үйлдчихэж байгаа юм. Ганц, нэг машины төлөө журмын хашаа руу байн, байн явах нь эрхэм шинжээчид яршигтай санагддаг байж магад. Гэтэл мань мэтийн ядарсан жолооч Журмын хашаанд хадгалуулсныхаа төлбөрт шатаж дуусч байгааг мэдээсэй. Эвдэрхий машиныг эзэд нь Журмын хашаанаас гаргаж авалгүй тэр чигт нь хаячихдаг гэдэг яриаг сонсоод итгэдэггүй байлаа. Харин өөрт тохиолдсон энэ явдлаас болж итгэсэн шүү” гэж ярьсан юм.

Энэ залуугийн яриа ортой гэдгийг журмын хашаанд машинаа түгжүүлж үзсэн хүмүүс мэдэх биз ээ. Өмнө нь Замын цагдаагийнхан зам дээр явж байгаад эвдэрсэн машиныг хувийн компаниар зөөлгөж жолооч нарын эсэргүүцэлтэй тулгарч байсан. Одоо харин орлогын хойноос хэт хөөцөлдөж, Журмын хашаандаа автомашин, вагончик, контейнер гээд зүсэн зүйлийн эд хадгалчихаад мөнгө ууталж суудаг болсон бололтой.      

Б.Болор