Эх хүүхдийн эрүүл мэндийн үндэсний төвийн хоёр эмч удаа дараалан иргэдийн төлсөн үргүйдлийн эмчилгээний төлбөрийг хувьдаа завшсан гэх хэрэгт холбогдсон шалгагдаж байна.

Тодруулбал, Уг төвийн Эх барих, эмэгтэйчүүдийн эмнэлгийн эмчилгээ эрхэлсэн орлогч дарга Х.Цолмон болон Үргүйдэл, нөхөн үржихүйн тасгийн эрхлэгч Д.Болормаа нар 2023 оноос хойших эмнэлэгт үзүүлсэн иргэдийн төлбөрийг цахимдаа бүртгэхгүйгээр өөрийн хамаарал бүхий хүмүүсийнхээ дансаар дамжуулан хувьдаа авдаг байсан нь нотлогдоод байгаа аж.

2023 оноос өдийг хүртэл буюу хоёр жилийн туршид энэ аргаараа завшсан мөнгө нь урьдчилсан байдлаар 200 сая төгрөг гэх бөгөөд тус эмч нарт холбогдох хэрэг одоогийн байдлаар Прокурорын ерөнхий газрын зөвшөөрөлтэйгөөр АТГ-т шалгагдаж байгаа юм байна.

Бид мэдээллийг тэнцвэртэй хүргэх үүднээс тухайн хоёр эмчээс холбогдсон хэргийн талаар тодруулах гэж холбогдоход мэдээлэл өгөхөөс татгалзлаа.

Үргүйдэл, нөхөн үржихүйн тасгийн эрхлэгч Д.Болормаагийн хувьд Анагаах ухааны их сургуулиа төгсмөгц Хөвсгөл аймагт нэг жил ажиллаад ЭХЭМҮТ-д ирж ажиллах болжээ. Өдгөө ЭХЭМҮТ-д 22 дахь жилээ ажиллаж байгаа бөгөөд Үргүйдэл, нөхөн үржихүйн тасгийн их эмчээр ажилладаг байхад нь Эх барих, эмэгтэйчүүдийн эмнэлгийн эмчилгээ эрхэлсэн орлогч дарга Х.Цолмон тасгийн эрхлэгчээр томилж байсан тухай эх сурвалжууд мэдээлж байна.

Иймд ажил мэргэжлийн онцлогоороо бусдаас мөнгө завшиж хувийн дансандаа авсан байж болзошгүйгээр АТГ-т шалгагдаж буй Х.Цолмон, Д.Болормаа нарын хөрөнгө орлогын мэдүүлгийг нягтлан хүргэж байна.

Эх барих, эмэгтэйчүүдийн эмнэлгийн эмчилгээ эрхэлсэн орлогч дарга Х.Цолмонгийн хувьд 53.8 сая төгрөгийн нийт орлоготой, 612 сая төгрөгийн орон сууц, барилга байгууламжтай, 30 саяар үнэлэгдэх Renault, Twingo загварын суудлын машинтай, 247 сая төгрөгөөр үнэлэгдэх үнэт эдлэлтэй, дотоодын банканд 72 сая төгрөгийн хадгаламжтай, 150 сая төгрөгийн авлагатай гэж 2023 онд ХОМ-доо мэдүүлсэн байна. Харин үргүйдлийн эмчилгээний төлбөрийг халаасалж эхэлсэн хугацаа болох 2023 оноос хойших хөрөнгө орлогын мэдүүлгээ бүртгүүлээгүй байна.

Гэсэн нь дээрх 2023 оны ХОМ-ийг 2021 оныхтой харьцуулахад нийт орлого 22.2 саяар, үнэт эдлэлийн өртөг 12 саяар өссөн үзүүлэлттэй харагдаж байна.

Харин Үргүйдэл, нөхөн үржихүйн тасгийн эрхлэгч Д.Болормаа 2023 онд ХОМ-дээ 49.5 сая төгрөгийн нийт орлоготой, 30 сая төгрөгийн гэр бүлийн орлоготой, 450 сая төгрөгөөр үнэлэгдэх орон сууц, барилга байгууламжтай, 160 сая төгрөгийн үнэтэй Toyota, Land Cruiser 200 загварын автомашинтай, 8 сая төгрөгийн үнэт эдлэлтэй, дотоодын банканд 4 сая төгрөгийн хадгаламжтай, 34 сая төгрөгийн зээлтэй хэмээн мэдүүлсэн байна. Мөн л тухайн 2023 оноос хойших ХОМ мэдүүлээгүй байгаа юм.

Дээрх хөрөнгө орлогын мэдүүлгийг 2021 оныхтой харьцуулан үзэхэд нийт орлого 10 орчим сая төгрөгөөр, гэр бүлийн орлого 26.5 сая төгрөгөөр нэмэгдэж 4 сая төгрөгийн хадгаламжтай болсон байна.

Эх Хүүхдийн Эрүүл Мэндийн Үндэсний Төв (ЭХЭМҮТ) нь 2014 оноос эхлэн үргүйдэл, нөхөн үржихүйн тусламж үйлчилгээг үзүүлж эхэлсэн. Тус төвийн Үргүйдэл, нөхөн үржихүйн тасаг нь жилдээ 7,500-8,000 хосыг оношилж, эмчилдэг бөгөөд үр шилжүүлэн суулгах эмчилгээг хийж буй. Ингэхдээ

• Оношилгоо: Үргүйдлийн шалтгааныг тодорхойлохын тулд шаардлагатай бүх төрлийн шинжилгээ, оношилгоог хийдэг.​
• Эмчилгээ: Шалтгаанаас хамааран эмийн болон мэс заслын эмчилгээ, нөхөн үржихүйн туслах аргуудыг хэрэглэдэг.​
• Зөвлөгөө: Хосуудад үргүйдлийн талаар зөвлөгөө өгч, сэтгэлзүйн дэмжлэг үзүүлдэг байна.

Үргүйдэл сүүлийн жилүүдэд нэмэгдсээр байгаа бөгөөд ЭХЭМҮТ-ийн Үргүйдэл, нөхөн үржихгүйн тасгийн нэг удаагийн эмчилгээний төлбөр нь 1.5-3.5 сая төгрөгийн өртөгтэй байдаг байна.

Хэрэв ЭХЭМҮТ-ийн мэргэжилтэн Х.Цолмон, Д.Болормаа нар шалгагдаж буй эл хэргийг үйлдсэн нь тогтоогдвол дараах хуулийн заалтаар зохицуулагдана.

Эрүүгийн хуулийн 22.1 дүгээр зүйл. Эрх мэдэл, албан тушаалын байдлаа урвуулан ашиглах

1. Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон бол нийтийн албанд ажиллах эрхийг хоёр жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
2. Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд ажиллах эрхийг хоёр жилээс найман жил хүртэл хугацаагаар хасаж хоёр жилээс найман жил хүртэл хугацаагаар хорих ял шийтгэнэ.
3. Энэ зүйлийн 1, 2 дахь хэсэгт заасан гэмт хэргийг улс төрд нөлөө бүхий этгээд, төрийн болон орон нутгийн өмчит, төрийн болон орон нутгийн өмчийн оролцоотой компани, улсын үйлдвэрийн газрын удирдах, эрх бүхий албан тушаалтан үйлдсэн бол нийтийн албанд ажиллах эрхийг бүх насаар хасаж таван жилээс арван хоёр жил хүртэл хугацаагаар хорих ял шийтгэнэ.