Далан настай эмэгтэйг гэртээ ганцаараа амьдардгийг нь далимдуулан аминд нь хүрсэн залуу Герман улсад төрсөн, Монгол Улсын иргэн 24-хэн настай цэл залуухан эр байж таарсан. Тэгвэл уг хэргийг үйлдсэн гэх сэжигтэн Б нь 70 настай эмэгтэйн ач охинтой хоёр жил гаруй хугацаанд үерхэж буй хэдийнэ бие, биенийхээрээ орж гардаг болсон сайн танил гэдэг нь эх сурвалжийн мэдээллээр батлагдлаа.

Талийгаач эмэгтэй Герман Улсад амьдарч байгаад ирсэн бөгөөд төрсөн хүү нь ч тус улсад ажиллаж амьдарч яваа гэнэ. Гэвч түүнийг  болоод ар гэрийнх нь байдлыг дэндүү сайн мэдэх ач охиных нь найз залуу настай эмэгтэйг ганцаараа амьдардгийг нь далимдуулан шунахайн сэдлээр аминд нь хүрч гэрт байсан хамаг үнэтэй цайтай зүйлсийг нь тонон дээрэмдсэн байна.

Тухайн хэрэг энэ сарын 17-нд гарсан бөгөөд үүнээс хойш 92 цагийн хугацаанд УМБГ-ын Онц хүнд гэмт хэрэгтэй тэмцэх хэлтэс, Улаанбаатар хотын цагдаагийн газрын онц хүнд гэмт хэрэгтэй тэмцэх хэлтэс, Эрүүгийн цагдаагийн газрын хамтарсан ажлын хэсгийн 18 алба хаагч гурван машинтайгаар сэжигтэнийг эрэн сурвалжилж, 20-ны орой баривчилсан юм. Сэжигтнийг баривчлах үеэр хохирогчийн гэрээс алга болсон түлхүүр, хутга зэрэг олдсон боловч бриллиантан шигтэйгээ бөгжийг нь хэдийнэ зарж борлуулсан байжээ.