Архангай аймгийн Булган сумын харьяат, "Алдар” спорт хорооны бөх, улсын арслан, даншигийн арслан Р.Пүрэвдагва танхайрах гэмт хэрэгт холбогдсон тухай мэдээлэл гарсан. Уг мэдээллийг Р.Пүрэвдагва арслан үгүйсгэжээ.

Тэрбээр өнгөрсөн долоо хоногт нийслэлийн Налайх дүүрэг, Тэрэлж орчмын амралтын газарт хүн зодсон. Зодуулсан хүний бие тааруу, Гэмтэл согог судлалын үндэсний төвийн Эрчимт эмчилгээний тасагт хэвтэн эмчлүүлж байгаа. Уг хэргийг Налайх дүүргийн Цагдаагийн хэлтэст шалгаж байгаа тухай хэвлэлүүд мэдээлсэн.

Уг мэдээллийг улсын арслан Р.Пүрэвдагва үгүйсгэн "Тэрэлж орчимд намайг танхайрсан, бусдын биед халдсан гэх мэдээлэл гарсан юм шиг байна. Би наадмаас хойш огт амраагүй байгаа. Одоо даншиг болох гээд бэлтгэл хийж байна. Энэ гүтгэлгийн чанартай мэдээ. Ийм мэдээлэл гарсанд ард түмнээсээ уучлалт гуймаар байна. Тийм зүйл гараагүй гэдгийг албан ёсоор мэдэгдье” хэмээсэн байна.

Г.Тэгшсүрэн