Сүүлийн өдрүүдэд цаг агаар хэт халсны улмаас бага насны хүүхдүүдийн дунд цусан суулга өвчин эрс нэмэгдсэн гэнэ. Уг өвчний үед халуурч, хэвлийгээр хүчтэй базлан, ойр ойрхон үнэргүй, цусан судалтай ялгадас гардаг байна.

Шигеллийн төрлийн нянгаар үүсгэгддэг уг цочмог халдварт өвчин нь бохир гар, ус, хоол хүнс, ахуйн замаар халдварладаг. Тиймээс дээрх шинж тэмдэг илэрвэл харьяа дүүргийнхээ халдвартын эмчид яаралтай хандахыг ХӨСҮГ-өөс сануулж байна. Мөн шингэн алдахаас сэргийлж, буцалсан ус, давс, чихрийн уусмал, будааны шүүс уухыг зөвлөж байна.

Дашрамд дурдахад, өнгөрсөн долоо хоногт Хордлогын яаралтай тусламжийн төвд эмэнд хордсон гурван хүн хандсан бол Гэмтэл согог судлалын үндэсний төвөөр унаж бэртсэн, зам, тээврийн осол, механик хүчин зүйлд өртсөн 1470 үйлчлүүлсний 30 хувь нь 0-15 хүүхэд байжээ.