ОХУ-ын Холимог тулааны урлагийн холбооны ерөнхийлөгч, алдарт тулаанч Федор Емельяненко өнгөрсөн мягмар гарагт ОХУ-ын Бүгд Найрамдах Чечень Улсад болсон "Ахмат 2016” гранпри тэмцээний үеэр хүүхдүүдийн дунд тулааны тэмцээн явуулсныг буруушаасан байна.

 

"Өсөн торниж буй хүүхдүүдийн хувьд бид үлгэр жишээ болж, тэдний эрүүл мэндийг хамгаалах ёстой. Хүүхдүүдийг томчуудын тэмцээнд оролцуулах нь тэдний эрүүл мэндэд нөхөж болшгүй хохирол учруулах бөгөөд энэ нь тэдний спортын карьерыг дуусгаад зогсохгүй бие махбодь, сэтгэл санааны хохирол дагуулна” гэж тэрбээр ярьсан байна. 

Мягмар гарагт Чеченьд болсон "Ахмат 2016” гранпри тэмцээн хүүхдийн болон мэргэжлийн тамирчид гэсэн хоёр төрлөөр болжээ. Хүүхдийн төрөлд Чеченийн удирдагч Рамзан Кадыровын гурван хүү болох 10 настай Ахмад, 9 настай Зелимхан, 8 настай Адам нар оролцож, үе тэнгийн хүүхдүүдтэй тулалдан гурвуулаа ялалт байгуулжээ.

Энэ тэмцээн томчуудын тулааны дүрмээр болсон нь хүүхдүүдийн хувьд зохимжгүй юм. Мөн холимог тулааны урлагийн дүрэмд 12-оос доош насны хүүхэд оролцохыг хориглодог гэдгийг  36 удаа ялалт байгуулж, 4 ялагдсан "Сүүлчийн эзэн хаан” хочит Федор Емельяненко дурджээ.

Мөн тэрбээр "өчигдөр Грозный хотод болсон тэмцээний үеэр болсон зүйл бол байж боломжгүй, зөвтгөж боломгүй явдал байсан" гэж нэмж хэлэв.