Йемений Хажжа мужийн эмнэлэг агаарын дайралтад өртөж, сүйрсэн талаар "www.dailymail.co.uk” мэдээллээ. Уг цэргийн ажиллагааны үеэр 11 хүн амиа алдаж, 50 гаруй хүн шархтсан байна. "Эмнэлгийн барилгыг дахин ашиглах боломжгүй” хэмээн НҮБ дахь Йемений төлөөлөгч "AFP” агентлаг мэдээлжээ.

Амиа алдагсдын ихэнх нь тус эмнэлгээр үйлчлүүлж байсан иргэд гэнэ. "Йемений удирдлагууд урьдчилан сануулахгүйгээр Хажжа мужид агаараас цохилт өгсөн этгээдийг эрэн сурвалжилж байна” хэмээн тус улсын Засгийн газрын хэвлэлийн албанаас мэдээлэв. Уг хэргийг НҮБ-ын Аюулгүй зөвлөл мөрдөн шалгахаар болсон байна.

Саудын араб тэргүүтэй Арабын цэргийн эвсэл өнгөрсөн оны долоодугаар сараас эхлэн Йемен улсад цохилт өгөх болсон юм. Цэргийн ажиллагааны уршгаар нийслэл Сана хотоос хоёр сая хүн дүрвэж, 10 мянга орчим хүн амиа алджээ.

Б.Дэлгэрцэцэг